მოსახლეობა ფიროსმანობის დღესასწაულის ჩაშლას გეგმავს

დედოფლისწყაროს რაიონის სოფელ მირზაანის მოსახლეობა თავს მიტოვებულად გრძნობს და პროტესტის ნიშნად 31 ოქტომბერს ნიკო ფიროსმანის სახლ-მუზეუმის ეზოში დაგეგმილი ფიროსმანობის დღესასწაულის ჩაშლას გეგმავს. ადგილობრივების აღშფოთებას ის ფაქტი იწვევს, რომ უკვე მერამდენე წელია სკოლის აღდგენას და სხვადასხვა პრობლემების მოგვარებას ითხოვენ, სპეციალური მიმართვაც ბევრგან გაგზავნეს, მაგრამ ამაოდ... დახმარებისთვის მირზაანელებმა პრეზიდენტსაც ღიად მიმართეს, თუმცა ხელისუფლება მოსახლეობას არ გამოხმაურებია:,,ფიროსმანობას ჩავშლით, მთავრობის წევრებს ცენტრალურ გზას გადავუკეტავთ, აქ რომ არ ჩამოვიდნენ! მირზაანი მთლად მიტოვებულია, სოფელი იცლება და მალე აღარ იარსებებს. ვაპირებთ, მუზეუმთან არავინ მივუშვათ... - აცხადებენ აღშფოთებული მირზაანელები.სკოლის აღდგენის მოთხოვნით, ადგილობრივები გასულ ორშაბათს პრეზიდენტის ავლაბრის რეზიდენციასთან საპროტესტო აქციების დაწყებას გეგმავდნენ, თუმცა პოლიციამ ტრანსპორტის დაქირავებისა და ჯგუფურად დედაქალაქში გამგზავრების საშუალება არ მისცა.ფიროსმანის სახლ-მუზეუმის დირექტორი ანზორ მაძღარაშვილი ამბობს, რომ მოსახლეობაში პროტესტი არის:,,კი ამბობენ რაღაცას, ცოტა გაბრაზებულები არიან სკოლა არა გვაქვსო... მაგრამ, არა მგონია, სოფლის 90% სიხარულით ელოდება ხოლმე ამ ღონისძიებას.``ადგილობრივები აცხადებენ, რომ მირზაანში უმუშევრობის პრობლემაც აქტუალურია და ნიკალას მუზეუმი ძირითადად მეზობელი სოფლის მაცხოვრებელი კადრებითაა დაკომპლექტებული.
მოსახლეობის მიერ პროტესტის ნიშნად ფიროსმანობის დღესასწაულზე ხელისუფლების წევრების არ შეშვებისა და გზების გადაკეტვის იდეას ოპოზიციური პარტიების წარმომადგენლებიც ეხმაურებიან. კონსერვატიული პარტიის დედოფლისწყაროს ორგანიზაციის ლიდერი მიხეილ ბიკაშვილი, რომელიც მირზაანის მკვიდრია და ადგილობრივების პრობლემებს კარგად იცნობს, ადასტურებს, რომ მოსახლეობა ღონისძიების ჩაშლას გეგმავს. ბიკაშვილი აცხადებს, რომ მოსახლეობას თავადაც შეუერთდება და პარტიულ ძალებსაც დაახმარებენ.
,,სოფელში არაერთი პრობლემაა, მირზაანი დაცლის საფრთხის წინაშე სერიოზულად დგას. ხელისუფლება კი არაფერს აკეთებს და დიდი ნიკალას სოფელი საერთოდ უყურადღებოდ აქვთ მიყოვებული. სოფლის დახმარების პროგრამის ფარგლებშიც კი არაფერი გაკეთებულა. ამიტომ, მოსახლეობა ამგვარად ცდილობს პრეზიდენტის ყურადღება მიიქციოს, იქნებ ასე მაუნც დაინტერესდნენ მირზაანელების პრობლემებით - აცხადებს ბიკაშვილი.მირზაანელების პროტესტს სხვა ოპოზიციური პარტიები თუ არასამთავრობო ორგანიზაციებიც შეუერთდებიან.